Ons hedendaagse tyd word gekenmerk deur geestelike misleiding, verwarring, en ‘n verdraaing van ons Reformatoriese geskiedenis wat teweeg gebring is deur voorstanders van ‘n radikale ommekeer in Skrifbeskouing. Die grootste aanslag teen die ware Kerk is die kritiese teologie wat sedert die Europese Verligting die outoriteit en betroubaarheid van die Woord van God ondermyn. In die voetspore van die historiese-kritiek het die marxisme, Feminisme, en LGBTQI+ bewegings kosbare reformatoriese teologiese opleidingsinstansies, kerke en ons geskiedenis gekaap. Skrifkritiese teoloë het ‘n monopolie by staatsbefondse tersiêre instellings en kolleges, en plaas hulleself nie onder die gesag van Christus en Sy Woord nie. Die ewige Woord van God is vervang met die altyd-veranderende filosofië van die mens. Die evangelie is nie net begrawe nie, maar diskriminasie en vervolging van hulle wat nog daardie evangelie glo, leer en verkondig het ‘n werklikheid geword. Aan die ander kant het van ons  Reformatoriese kerke nie altyd daarin geslaag om ons nasie se sondes te vermy nie, hieronder tel rassisme, gebrekkige omgee vir die armes, gebrek aan persoonlike heilige lewenswandel, koloniale meerderwaardigheid, materialisme, ‘n verbruikersmentaliteit, en ‘n louheid in ons sendingywer aan hulle wat nie deel van ons groep is nie.